CHI Tachinomi (7號碼頭)

Open Now

Now Closed

喺中環天星碼頭下層嘅一角，居然有一間地道嘅日式串燒屋台！抗疫疲勞加冇得去旅行嘅我哋，絕對唔可以錯過呢個機會！7月嘅中環碼頭，有少少涼風，不過由於屋台係開放式，唔建議著長袖長褲嚟食。著件頹T同熟人嚟個輕鬆愉快聚會就合適不過。屋台當然唔少得飲嘢！三得利嘅Premium Malt 向來係我嘅至愛，當年喺日本搭新幹線飲過罐啤，念念不忘。呢度供應生啤，幼滑嘅口感同味道更上一層樓。烏龍茶亦夠凍。《日本雞肉丸子串》($28) 燒得外脆內軟，非常多汁，肉丸有咬口亦食得出雞肉嘅texture。雖然唔係炭爐燒，但也接近日本當地水準。右邊係《鹽燒牛舌》($38)，牛舌切得稍薄但以呢個價錢而言味道出眾。左邊係《牛肉土手燒》($38)，疑似柱侯炆牛腩嘅煮法，醬汁較甜，充滿牛肉香。用上牛腩同牛筋，文火細炆至入口即溶，啲牛汁亦非常美味。來一份《大阪牛肉飯》($90，大)，基本上係將牛肉土手燒放落圓潤飽滿嘅珍珠米上面，啲牛肉精華滲落啲飯度，食到唔停得口。《鰻魚飯》($55，細) 鰻魚一啲都唔腥，亦無同價位容易出現嘅魚骨。鰻魚燒得外脆內嫩之餘，蒲燒醬落得恰到好處，即使淨係嚟食呢個飯同牛肉飯都值得一來。