牛一 (元朗廣場) (Closed)

入夜後天氣轉涼左，個心就即刻想打邊爐，暖暖個人。見牛一無乜人排隊，就入去過下邊爐癮同做牛魔王😈見到餐牌澳洲M6-M7和牛套餐做緊特價，本身368蚊減到288蚊，食足100分鐘，咁梗係食佢啦。今次揀左個蕃茄豚骨湯，個湯底紅紅地蕃茄味道就唔係幾夠，不過唔緊要，外面自助區有成盤新鮮角切蕃茄，即刻加返幾個來增味！個套餐有7款肉類任食，有5款牛，1款雞同1款豬，咁來得做牛魔王梗係專食牛啦！呢隻美國見島和牛牛味夠，又有口感，切得夠簿唔會咬到好辛苦，唔錯！咁套餐主打澳洲M6-7和牛，當然唔叫唔得，諗住任食質素會好麻麻，估唔到油香味夠，肉質又滑，大大塊得嚟咬幾啖都食完，真係超出預期。另外2款都係美國牛，1個係美國Prime肩胛肋眼，1款係美國特選榖飼牛，前者肉味濃不過口感有啲柴，後者就又柴又唔夠肉味，所以都係主力食返和牛！咁食牛之餘都要食下菜，自助區啲菜種類都幾多，有5,6種，仲靚靚仔仔，塊塊都又大又完整，真係有啲意外。今次食足到最後一分鐘先走，抱住成肚牛咁走真係幸福。