韓牛韓式燒烤 (Closed)

今日去到創興廣場一樓嘅韓牛食韓燒，地點好就腳，唔洗等𨋢直接電梯上就到。一入到去地方好闊落，唔使點等職員就即刻幫你開爐，而且嘢飲種類好多，有幾款茶同汽水，最緊要嘅係呢度嘅啤酒係唔使加錢任飲嘅！嘢食方面呢度嘅種類無論熟食定係壽司都補充得好快，除咗一啲刺身之外，都有手卷同埋軍艦卷。炸物嘅種類都好多，食左海鮮、雞同埋春卷，溫度都係熱嘅，唔會攤到凍曬！涼拌配菜有10幾款 。熱食嘅話就有豬腳薑、韓式粉絲、蘿蔔牛腩等等。肉類方面都有好多選擇，款式呢度十分齊全，同埋肉類唔會太老，醃得又入味。甜品種類都幾多，除咗有一杯杯嘅布甸、啫喱、桂花糕之外，比較特別係呢度有朱古力噴泉，配料除咗水果之外亦有唔同嘅棉花糖，同埋仲有部雪糕機。更驚喜嘅係呢度有維記新出嘅榴槤雪糕同埋薑味雪糕，呢兩隻味都夠晒特別。呢度嘅雪糕唔會雪得太硬，拎出嚟放一陣已經食到，雖然係食90分鐘但係店員都好好冇催我哋。