串得起串燒專門店 (Closed)

涼風凜凜，同食家兩個去左串得起。自試過佢地既出品之後，要食物穩陣好食又要有得飲番杯，都會來呢度晚飯，簡簡單單叫幾串串燒，飲下酒傾下計是一樂也。食家話羊架依然係燒得咁juicy，羊羶味濃郁，不會燒得過老，香嫩好食﹗我就最愛佢地既蜜汁雞翼，皮脆肉嫩，蜜味香濃，一人兩隻一定嫌少。餐牌上無的燒蒜粒，要問下老闆佢有冇貨先有得食，蒜頭即叫即剝，味道濃烈至極，真係唔係個個都受得起，我就覺得相當好食了﹗之前彈過佢地既牛出品質素一般，今晚再試佢地既牛肋粒，今次呢串肥瘦適中，肉味濃亦軟熟少筋做得好了很多，同老闆吹水佢都話0的來貨真係一水水，未必次次都食到好野，只有食之前就問下佢先啦﹗佢都話最近0的羊肉串來貨比較韌，寧願賣少樣野都唔俾0的客人食，怕客食左覺得唔好食，呢種態度相當正確。燒花甲夠大隻，一客六隻，加蒜蓉及醬汁同燒最美味。牛油粟米講左好多次好好食，水準依舊保持，牛油味香濃粟米夠脆夠甜，新鮮貨不是雪藏貨可比，老闆娘話整一條粟米要燒成大約半小時，相當費時及考功夫，來到唔叫真係對唔住自己﹗最後來個海鮮烏冬，烏冬彈牙好食，用料有青口、蜆、魷魚、蟹柳及椰菜等，乾身好味，作結最滿足。食咁多野埋單都係百幾蚊，抵食