味真 (Closed)

尋晚同朋友去咗第一城搵食，聽講有間新開嘅韓國菜餐廳好抵食。呢間餐廳嘅裝修好有feel，唔係嗰啲傳統韓國風，而係一種現代簡約風格，但又唔失韓國特色。更重要係，入到去感覺到佢哋服務好親切。我哋叫咗豬三層肉同伊比利亞豬肩，兩款肉質都好味。OPPA仲會主動幫你燒肉，真係一流嘅服務😌 豬三層肉燒到外皮脆脆，內裡仲保持住油脂香味，每一啖都好滿足。伊比利亞豬肩就更加唔使講，肉質細嫩得嚟又唔會太肥。燒豬皮係好有驚喜，充滿骨膠原☺️點埋黃豆粉、咖喱粉同醬汁，好好味😋除咗燒肉，我哋仲叫咗大醬湯同韓式雞蛋羹。大醬湯係用傳統韓國大醬煮，味道濃郁，入面有好多料，例如豆腐、蔬菜同肉，每一口都好暖胃。韓式雞蛋羹就好滑溜。飲品方面，我哋試咗甜米露同西瓜梳打。甜米露帶有陣陣米香，飲落去又唔會過甜，好清新。西瓜梳打有陣淡淡嘅西瓜味，超級解渴。食咗咁多嘢原來全單都係四百幾蚊，真係超級好抵食！以呢個價錢可以食到咁高質素嘅韓國菜，真係無得輸。