錦田鄉村俱樂部

Open Now

Now Closed

今次係第二次來，兩次都係跟旅行團。第一次係燒烤，幾十蚊算係多野食，環境夠大，樓底高，點大火燒都唔驚大煙侷親自己。附近有衛生間同洗手設備，如果人多，女士就要花時間排隊。當日仲落傾盤大雨；不過，好在個場係鐵皮屋頂，幾大雨都唔怕。呢次就同屋企人，無幫襯燒烤場，只係參觀動物場入面既兔仔、小羊、大唐虱，仲有親手採擇士多啤梨。士多啤梨以每磅$60計，多少隨意；當然，要唔晒就唔好亂擇喇...士多啤梨要食先至好洗，否則好易爛。士多啤梨園好大，好多人採擇，自己好晏入來都擇咗$70...試過味道有啲甜唔算差。場內亦有釣魚、騎馬車、單車、倒沙樽、彩畫、珠串等家庭樂玩意。臨走時食山水豆腐花$7/個，自己奉3碗埋檯已經覺得唔對路，豆腐花邊有一嚿嚿上碗架!..正常食豆腐花係要用片殼，將豆腐花片成薄片上碗，混和花奶或糖水先食到佢既嫩滑。一啖擺落口，哇...邊係香港人食架...無豆味不特止，仲粗嚡到無朋友，屋企人要猛落紅糖先食得落...