雲貴川風味 (西洋菜南街) (Closed)

收工落咗旺角睇吓有乜好食喺社交平台群組見到有人講過呢一間就入去試試佢，8點半左右入去唔太多人唔洗等麻辣米線-小辣配魚片頭，墨魚丸$50，本身叫咗個米線係爽啲（即硬身d?)，嚟到係超淋嘅，至於個湯底顏色就好夠啦，小辣完全冇feel，而且冇麻辣嘅感覺。墨魚丸超淋，魚片頭都好味既。餐飲凍豆漿，太口渴飲左兩淡先影，唔係枝裝入貨果d，味道偏淡都唔錯。藤椒米線-小辣配魚皮餃，墨魚頭$52，原來藤椒係綠色既湯底，差少少以為係芫荽湯，味道幾特別，完全唔識形容感覺唔係太似藤椒嘅味道，都唔太差既，小辣唔辣。魚皮餃就麻麻地，個皮太淋。墨魚頭都爽口，係可以一試既餸。米線揀左佢個爽d😂…都係超淋既。涼伴土豆絲$25，呢個都可以試既，小辣，夠爽夠凍。但食到尾有少少鹹。有電子落單系統，入面都多圖可以「參考」下既，雖然環保d但個人認為圈紙仔方便d。