天天海南雞飯 (Fashion Walk)

Open Now

Now Closed

今日約咗朋友嚟銅鑼灣食嘢，朋友揀咗呢間「天天海南雞」話喺新加坡食過好好食，仲拎咗好多米芝蓮推介，估唔到香港都有分店。一入去就覺得環境好闊落，啲餐具好精緻，好乾淨，坐得好舒服，好啱女仔嚟打卡。天天海南雞（中份）海南雞勁滑，有少少青檸味，另外仲有經典嘅三隻醬可以自由配搭，包括薑蓉、辣椒醬同黑醬油。我最鍾意點辣椒醬，好惹味。仲有爽口青瓜，好fresh!星洲海鮮喇沙水晶粉煲最欣賞就係有個煲㷤住佢keep住溫度，水晶粉勁滑，索晒啲喇沙汁，而且好足料，有蝦、魷魚、豆卜、雞蛋同青口，口感非常豐富。青檸鹹魚小芥蘭同樣地好貼心有個煲㷤住佢，我最鍾意食嘅蔬菜就係芥蘭，鍾意佢夠爽口，雖然有鹹魚但係就唔會覺得好鹹，加咗蒜頭、薑同埋青檸味道好清新。新加坡原味豆花（可加$10美祿）我地揀咗原味，原本以為甜品一定好甜，但佢唔會太甜，符合健康潮流。有好重嘅豆味，好滑，入口即溶，食落個喉嚨好舒服。減肥嘅我原本話淨係食一啖，最後忍唔住食咗半碗。見到隔籬枱嘅老鼠粉同蝦多士都好吸引，不過我哋得兩個人食唔到咁多嘢，下次要約埋多啲朋友再嚟食。