冬蔭NOODLE (Closed)

今日嚟到尖沙咀行街，條街依然係咁多人熙來攘往，經過一間泰國菜，見到入邊嘅裝修全部枱鄧都係粉紅色，以為係一間咖啡店，估唔到係一間泰國菜，真係未見過咁有特色嘅泰國菜啊，一於同朋友入去試吓啦，坐喺裏面覺得自己猶如一位小公主，裝飾好特別，而且服務員態度親切有禮，等我就做一晚公主啦⋯⋯海南雞，金黃色嘅外皮，雞皮入口爽脆彈牙，唔會覺得好油膩，雞肉唔會乾身，好滑，就算連雞胸都唔會覺得鞋口。馬拉盞炒通菜，通菜充滿鑊氣，辣辣地，但係又唔會太難，完全迎合香港人嘅口味，通菜炒豆碧綠色，淨係見到已經胃口大開，而且充滿馬拉盞嘅香氣，令人一試難忘。串燒豬肉，廚師火候控制得啱啱好，而且個賣相都好靚，入口唔會太過乾身，咬落充滿肉汁香氣，而且點上特有嘅醬汁，分外覺得滋味。蠔仔煎蛋，淨係見到啲雞蛋煎至金黃食，我已經流晒口水啦，好仔好新鮮，入口鮮甜，而且雞蛋唔會太過火，保持滑脫脫嘅口感，連埋啲蠔仔，入口充滿鮮味啊⋯⋯