新記煲仔雞粥 (Closed)

呢度D靚粥街知巷聞，之前已經慕名黎食過，不過原來粥以外其他出品質素亦相當唔錯，今晚呢餐甚有驚喜……外皮炸到金黃色既乳鴿，睇見已經令人想要流口水，大家急不及待伸手去試。一啖咬落去，外皮好香好酥脆，入面肉質甘香嫩滑又富肉汁，回味悠長，連手指都吮埋。呢個炸魷魚鬚亦可以話好食到停唔到口，炸到熱辣辣，超級香脆可口，口感外層酥脆，內裡柔韌鮮嫩，絕對係佐酒既好拍檔。蒜蓉炒菜心呢道家常菜我諗好多人都成日喺屋企食到，不過就唔係次次都咁好味，好睇阿媽買唔買到靚菜~而呢度既菜心好嫩，味道清甜，口感爽脆，營養豐富，再加埋爆香後既蒜蓉，簡單好滋味！蒜蓉炒螺肉係一道重口味既料理，搭配大量的蒜、蔥、椒，香氣逼人！螺肉香口惹味又鮮美，脆脆口感，好有嚼勁，令人一食就上癮，又係同啤酒好夾，好快就已經成碟空晒！齋腸製作好似簡單但又好考功夫，幾可食到真係好好味既？一係太厚一係太薄一係太粉，完全唔係望落去咁簡單架！所以要讚下呢度整得幾有水準，點少少豉油，味道同口感都令人滿意。