Amber’s Table

Open Now

Now Closed

通咗紅磡地鐵站後， 去黃埔方便咗好多， 所以不時去揾吓有咩食， 見到Amber's Table 格調雅致， 仲有想食嘅煙肉眼扒， 所以立即入去食個晚餐。🍭焗牛骨髓一向以為牛⻣髓好濃味， 原來錯哂，呢個係用咗和牛肉碎同牛骨髓混合一齊焗， 可以保持牛嘅鮮味，口感就更豐富，再配烤麵包，咁嘅食法原來好搭， 香口之餘仲脆卜卜， 一啲都唔油膩。🍭煙肉眼扒一向鐘意食比較生嘅牛扒， 所以今次叫咗四成熟，個皮少許脆脆金黃，切開依然見到粉嫩柔軟，無破壞肉原有嘅質感，件肉眼扒本身脂肪少牛味濃，用微火响枱上保持温度，肉眼扒上面嘅香草牛油慢慢溶化， 潤澤咗牛扒外，仲加添香草味，好惹味。🍭燒德國鹹豬手好細心咁巳切好細細嚿易入口， 外皮爆脆得嚟又煙韌， 啲肉唔會燒到乾哂， 仲好滑嘟嘟, 夾住啲酸菜食， 酸酸地咸咸地， 好醒胃。🍭梳乎厘蛋白梳乎厘好澎湃， 2人份好足， 口感軟綿綿， 好有蛋香味， 唔過份甜， 不知不覺就食哂， 好味。再配特飲椰子波蘿沙冰同玫瑰椰子沙冰， 凍涼嘅特飲配鹹豬手同肉眼扒， 暑汽全消。