Perla Restaurant (Closed)

今月公司爆數, Bonus令我相當滿意, 於是book咗間超高檔餐廳同家人食餐好。 選址全港最高嘅大廈101樓「Perla Restaurant」嘆南意海鮮菜。環境視野絕對冇得頂! 特大玻璃窗, 環境開揚, 邊嘆美食, 邊欣賞美景, 幾咁chill~餐廳只供應數款dinner set選擇, 揀咗:首先送上 welcome drinks白酒,再上麵包籃, 四選一欖橄油配搭, 分別為淡味、濃味、蕃茄味同果香味。頭盤嘅擺盤好靚, 其中魚骨狀餅乾燒當特別, 岩哂打卡。我最中意係煙三文魚粒配沙律醬, 很有鹹香。鹽醃魚卷: 地中海魚, 加上青檸汁、黑魚子醬, 微酸鹹香, 岩哂襯淡味魚。Pasta配以蝦頭熬製醬汁調味, 配上五款不同海鮮, 啖啖有驚喜。件魚配上南瓜蔬菜汁, 魚皮脆卜卜, 魚肉雖算不上嫩滑, 不過個汁做得好滑, 口感取得平均。好快就到甜品環節,蛋白脆餅加上雲呢拿cream同埋日本杮, 中間有日本杮汁, 蛋白脆餅入口滲出生味, 慢慢溶化, 整體味道香甜多汁。最後仲有四款小甜品, 賣相精緻, 不同味道, 不同驚喜。最中意綠色果粒, 開心果味重, 甜甜的。