L'AMOUR

近排喺社交媒體望到有明星介紹呢間餐廳，睇完介紹覺得好正，所以今日就同朋友一齊嚟試吓，餐廳喺大埔太和站附近，行過嚟都幾方便，而且對出仲有一個公眾停車場揸車亦非常方便。餐廳裝修走高檔路線，首先大門用咗落地液晶體大玻璃門，當大門關上後會有一個電子屏障，街外人睇唔到餐廳裏面私隱度非常好，傢俱選擇亦非常唔錯，而且仲有一個超大嘅玫瑰花擺設。餐牌提供小食、沙律、湯、薏米飯、意粉、主菜、前菜等等。時令生蠔 ($338 / 6 隻) : 生蠔非常之高質，肥美又鮮甜 🤤 食完半打忍唔住再叫咗半打，食得生蠔當然要叫返兩杯酒 Chill 下。海膽多士 ($358 / 6 件) : 每件多士上都有兩件海膽，而且海膽上面更鋪上金箔，海膽超甘甜，真係睇得又食得。焦糖法式燉鵝肝 ($208) : 最後食埋呢個非常有藝術感嘅小食，廚師將麵包整成花瓣形狀，食客將花瓣搣落嚟，再搽上焦糖鵝肝醬食，鵝肝味道超濃郁。