Banh mi pate (Vietnam Genuine)

Open Now

Now Closed

今日過開嚟跑馬地整啲嘢，順便喺度食埋晚餐。上網睇話呢間係明星小店，好多藝人名人會嚟食，一於試下係咪咁正，順便睇下會唔會見到明星。我自己叫咗個安格斯生牛肉湯河，佢牛肉嘅份量都唔少㗎。九層塔同埋青檸係另上嘅，想要酸啲定香啲都可以自己決定。而我自己覺得加咗青檸簡直係畫蛇點睛，青檸嘅酸帶出咗個牛骨湯嘅甜，真係好開胃架。然後佢啲牛肉都真係靚嘢，因為喺其他食生牛肉河其實都好驚佢浸耐咗會過熟，然之後食落太老。但係因為呢個安格斯就算你見到佢變晒色都仲係好腍，牛味都夠重。然後佢呢度仲有一個特色嘢，就係越式法包，佢真係原條法包俾晒你，食完呢個法包都真係好夠飽。佢個包出邊係超脆，原本已經聽到隔籬枱食，好似食緊薯片咁，但係中間又夠軟熟。再加埋佢將所有配料都切做一條條，啱啱好每一啖都會食到唔同嘅配料，食落都有鵝肝醬嘅香味，同埋好多蔬菜絲，成件事好清新都好健康。另外仲有一樣好特別嘅嘢就係佢個蛋白越南啤酒。佢係將一隻蛋白打到起晒泡，見到啲鋪係好濃密好幼滑，再加埋個啤酒底，飲落去好似奶蓋咁都幾得意。港島區，以精緻嘅越南菜嚟講都差唔多係呢個價錢，而且佢個份量都好夠。