百樂金宴 (Closed)

星期六放假，約埋幾個舊同事聚舊，飲茶就最方便啦，可以慢慢食點心傾下計。三個人叫左六個點心，份量差唔多又唔會太飽。XO醬炒蘿蔔糕 :相比以前叫開既煎蘿蔔糕，近年去飲茶都會轉叫呢款XO醬炒蘿蔔糕，貪佢細細粒容易食，味道亦無咁單調。蘿蔔糕用XO醬炒到好香，上檯時熱辣辣，入口香脆，一啖一件話咁快就食晒。豉汁蒸鳳爪 :鳳爪蒸得夠淋，亦都好入味，略嫌汁唔夠多。潮州蒸粉果 :皮夠煙韌，唔會一夾起就散晒，餡料都好足，蝦夠新鮮彈牙。人蔘湯灌湯餃 :湯汁鮮甜，人蔘味唔係特別濃，灌湯餃皮薄，連埋湯食令人感到好暖和。雪山叉燒包 :近年流行既叉燒包款式，叉燒包面焗得香脆，叉燒餡熱辣辣，亦都相當豐富，比傳統既叉燒包及叉燒餐包更好味。奶皇馬拉糕 :馬拉糕一向係我既至愛，去親飲茶都一定要叫，呢度既馬拉糕夠鬆軟，配合埋奶皇餡都唔會太甜，但個人都係喜歡傳統馬拉糕多d。總括黎講，呢度點心都幾好味，亦都坐得幾舒服，係位置有少少唔就腳，但周末黎飲茶嘆下點心都唔錯呀。