小神燈新派飯館 (Closed)

放工黎左小神燈食飯，入到去見到啲霓虹燈好靚，前少少有個電車卡座，牆身有唔同既漫畫風佈置介紹佢地既菜式。餐廳用懷舊玻璃膽水壺裝滾水，真係賣少見少。Menu有好多特色小菜，花功夫既菜、新派野、家常菜，每樣食材都有唔同煮法俾你揀。我地揀左啲特色野食，屋企難整😆糯米炒膏蟹係砂煲上熱焫焫，打開蓋見到好多蟹膏，仲有原隻膏蟹食，糯米飯炒得好香夠乾身，粒粒分明又有少少飯焦，聞落有焦香味，食落煙煙韌韌。奇趣脆皮豬手，燒得好脆，每件切片厚薄平均，豬手肉焗得岩岩好唔會好乾，點上芥末醬好食！腿茸菜膽雞，半隻雞都好大份，雞肉肉質嫩滑且結實，有雞味食落啖啖肉，本身醃得好夠味，唔需要點任何醬汁都好食。石澳梅菜蒸菜心，滿滿既梅菜絲、椒絲、蔥花舖滿菜心上面，蒸既時間岩岩好，菜心食落爽口。見到有楊枝甘露就叫左碗，好足料，味道清甜爽口帶少少西柚酸，糖水唔會死甜。總括黎講我地都幾鐘意呢間中菜館，價錢公道，啲樓面姐姐又好。