Hard Rock Cafe (Closed)

同朋友諗住去中環食飯飲嘢，友人揀咗係呢間到食晚飯，店內氣氛幾好，不過枱與枱之間隔得好近，隔離枱講咩我地都聽到，所以我都好驚隔離聽到晒我地啲對話，佢地啲嘢都幾大份，兩個人叫三樣嘢都食唔晒，平時係其他食肆叫四樣都可以掃清光。仲有我地飲氣水，可以免費添飲，不過可惜係百事。牛肉嘅沙律，牛肉細細粒，八成熟到，唔會「un」，剛剛好，好好食，有啲芝士薄片同芝士粉，麵包粒好脆，生菜都幾新鮮，不過無咩汁，減肥嘅人就啱晒。大蝦意粉，有兩片蒜茸麵包伴碟，有幾隻大蝦，啲肉幾爽，扁身意粉，唔會過「林」，硬度適中，算係茄汁底掛，係橙紅色汁，不過唔係好有茄味，仲有啲橄欖等等，食落唔會好油膩。燒豬肋骨配薯條，有一兜BBQ醬同一兜酸菜，豬肋骨好「林」，唔使好出力切就可以骨肉分離，好入味，BBQ醬濃味得黎又甜甜地，唔會太單調，薯條係粗身炸嘅，外脆內軟，有薯仔味。好多人都係邊飲酒邊食小食，小食拼盤大大份，好吸引,不過人手好似唔夠，成日都見唔到侍應，每次需要叫人嘅時候都要等幾耐下。不過食物質素方面算係整體都好好。值得再去。