潮窩 (Closed)

香港人最鍾意打邊爐㗎啦！見天氣涼涼地同男朋友去紅磡黃埔打邊爐，見到呢間潮窩，好精美～好新淨！我哋又唔鍾意食任食，寧願食啲食物同環境都有質素嘅火鍋店。就入咗去試吓。醬料都好乾淨啊。而且好多款揀沙嗲醬麻醬必備啦！都係我嘅至愛～打邊爐我哋最鍾意叫清涼啲嘅飲品，例如酸梅湯啊等等，今次就嗌咗竹蔗茅根，好清甜喎。湯底方面，呢間餐廳都有好多選擇！出邊成日食開沙嗲鴛鴦湯底，今次我哋試吓啲比較特別嘅湯底，叫咗鹹菜豬肚雞湯。個湯底好足料，好多豬肚，差唔多有成隻雞咁滯。唔使講一定要叫肥牛啦，我哋今次叫咗唔會太肥又唔會太瘦嘅安格斯牛小排。鋪得好靚呀，而且好新鮮！而且食落好有牛味唔會太薄啱啱好。餐廳仲有好多特色嘅手打丸，例如我哋叫咗呢兩款，都係有餡嘅丸！手打真係唔同啲！好彈牙而且入邊有餡，好特別！蝦丸入邊有鹹蛋，而墨魚丸入邊就有芥茉醬。出邊好少有咁樣嘅做法。火鍋湯底好足料，就咁飲都好好味。當我地話埋單之際，店員仲話等一等，有糖水送啊！佢哋送咗一人一碗湯圓紅豆沙，好滿足。