和牛燒肉‧純 (Moved) New Location

呢排做到死死吓，又係時候食餐好嘅奬賞吓自己。今晚揀咗銅鑼灣嘅《和牛燒肉·純》餐廳設計好有日本居酒屋feel, 座上客也有不少日本人，真係有D置身喺日本嘅感覺，所以我先嗌杯日本梅酒，呷一口，等自己完全投入日劇《XX的美食家》嗰種feel，咁就食得份外美味。今晚揀咗四款燒肉，慢慢燒，慢慢歎。 特選日本產和牛西冷，色澤嫩紅，雪花紋細密均匀，一睇就想像到入口即溶嘅感覺，燒起來肉香撲鼻，一啖一口，滋味無窮。日本產和牛上牛排肉，肉質細腻，肉味濃郁，比較有咬口，截然不同嘅美味享受。再來嘅係日本產豚腩肉，呢個係個人喜好，每次燒肉都要點一份腩肉，一層肥一層瘦，口感特別豐富。最後烤嘅係壺漬牛排，因為牛排經過特製醬汁醃漬，所以要留待最後先燒。薄薄一片牛排，滿滿醬汁滋味，令人回味無窮。做人要對自己好少少，得閒揀餐好嘅嚟食，咁先至有quality of life㗎嘛！