moono (Closed)

本身想去Ovule Bakery食麵包，點知撞正員工lunch time，唯有轉移陣地，去到都係喺深水埗既moono食甜品。moono應該算得上喺香港第一間整vegan cake roll既bakery，即使依家越黎越多餐廳有vegan cake roll食，moono既原祖地位都唔會變。第一次食佢地既cake roll既時候，感覺比較乾身，啲氣泡都比較大。但今次再黎食既時候就留意到個蛋糕質地冇咁乾，變得更軟綿綿。Tiramisu味道非常濃郁，啲cream夠哂滑，感受到佢地既進步。朱古力撻食過一次，水準依然，無論係賣相、味道同口感都令人滿意。個朱古力餡係偏苦甜既，啱啲唔鐘意食太甜既人。之前黎合舍果陣，除左moono之外另一個partner都係做素食，今次再黎，竟然變左有肉賣，有一下仲諗會唔會係素肉，但聞真啲就知係真肉。如果唔想一邊食蛋糕一邊聞住啲肉味，都係買走食算喇。