水門雞飯 (裕民坊YM²)

Open Now

Now Closed

以往都係出旺角先食到～呢間分店雖然座位比較少，但都乾淨企理。下午兩點嚟到都要排隊，好彩排一陣就入得。我哋點了1份水門雞飯轉雞髀+加雞什，少飯～一碗海鮮冬蔭公湯金邊粉（全走），豬雞串燒。飲品點了泰式奶茶& 凍鮮檸梳打。先嚟一碗雞湯，好重胡椒味，正！水門雞飯的雞髀肉煮得夠淋好滑亦夠味，而且冇骨啖啖肉食落好方便，連平時唔敢食雞皮的我都連皮食得乾乾淨淨，每件雞醮少少醬汁食就更好味。雞油飯底啖啖油香又唔會好油膩，雞什有雞腎，黃油雞腸同雞紅，推介黃油雞腸，洗得乾淨之餘有油香，實在食唔停口。海鮮冬蔭公湯金邊粉加豬肉丸，大大碗，配料非常豐富有蝦，魷魚及青口。冬蔭公湯底少少甜，唔會太辣，幾開胃。金邊粉食落夠滑，同冬蔭公好搭。豬雞串燒大大串厚肉，醃料好香，配有2款醬汁，一款酸酸地有青瓜，配肉食好清新。另一款沙爹，花生味香濃，食到最後唔夠點😋朋友杯凍鮮檸梳打夠解膩，而泰式奶茶夠香濃口味正宗，各有千秋。見到隔離枱的芒果糯米飯睇落唔錯，下次再嚟試！