日喜樓 (Closed)

登龍街好多好野食，相信依句statement大家都唔會反對，今日同媽咪食左日喜樓，典型既一間上海加四川餐廳。所以我地都叫番啲典型既上海菜食，下次有機先再試埋啲川菜。我同媽咪嗌咗醉雞，小籠包，熏魚，鍋貼，擔擔面。醉雞全部都係用雞髀，雞肉非常嫩滑，酒味冇過重，幾好，賣相都十分好同埋份量都夠。小籠包正常地多汁。過熏魚整得唔錯，類似有糖醋魚嘅感覺，小小嘅酸甜味，熏魚外層非常脆口。鍋貼外皮較硬身。擔擔面味道非常濃郁，有少少辣，佢依款係冇花生味嗰款嘅擔擔麵。呢度有啲特飲買一送一，我就試咗個香茅薑茶，感覺有啲似薑味汽水走氣同埋多咗香茅，感覺幾清新。總結：價錢同食物質素成正比，座位坐得好闊落，同朋友黎小聚嘅話都係一個唔錯嘅地方。