香港華商銀行公會 (Under Renovation)

舞伴搖身一變成大銀行家後即入埋「香港華商銀行公會」，真係冇估到原來私人會所嘅年費只須$50，冇入會費，絕對抵玩，不過一旦離職後其年費就會變做$500，亦可選擇退會，咁都好公平。收到通知10月22日起，會所限時推出節令「精選大閘蟹全蟹餐」（$550/位；兩位起），即約同小肥去試；一睇到菜單上其中一項為原隻清蒸大閘蟹時，細佬直言自己唔識食喎，靚女廚神仲好有誠意咁話拆蟹可包喺佢身上，嘻嘻，教人難以推搪！之前黎親都係長輩請客，大班人有房坐，第一次喺大堂用餐，感覺開揚啲，連冷氣都勁啲。餐桌上擺有自用及公用餐具，仲有成盒紙巾任用，夠哂衛生。蟹宴初推出，店內似乎只有兩口子預訂，全程由肥叔叔主持，餸菜續道上，以確保每款食用時為最佳狀態，時間控制得恰到好處，專業得很！前菜拼盆：打頭陣嘅三款前菜「黃金蟹粉百花球」、「蟹粉脆春卷」、「野蜂蜜酸子薑」兩人份量一同以拼盤呈上。炸至金黃嘅黃金蟹粉百花球鬆爽彈牙，邊食啲黃金蟹粉邊爆於口腔，舌尖滲滿鮮香甜美，爆！熱辣辣、脆卜卜嘅蟹粉脆春卷毫不油膩，餡心包入蟹粉更覺鮮嫩潤甜。XO仔一向少食薑，因為怕辣。意外地塗上野蜂蜜醬嘅子薑甜潤爽脆，雖帶有辣勁，但就易入口得多。大閘蟹