隆記茶室 (Closed)

今日放咗學之後，同朋友去位於北角和富道嘅隆記茶室。食完之後，知道又有好西要推介俾大家！我哋咁啱去到嘅時候係午市時段，好多人等位。餐廳空間感好闊落，裝潢好有中國特色，非常特別，窗邊仲有啲茶包嘅裝飾襯托着。今日超級肚餓，我點左餐廳推介嘅翻啅雞髀茄膏飯，再加一杯雪糕紅豆冰。首先講下碟飯先，分量好大不特止，雞髀亦都好大隻。雞髀外皮好脆， 肉質有咬口，唔會好肥膩。白飯方面，粒粒分明，味道有濃烈嘅蕃茄味，非常開胃。個飯入邊仲夾雜左鮮蝦同埋菠蘿，分量亦都好足料。最值得欣賞嘅係佢杯雪糕紅豆冰，有一大球雲呢嗱雪糕之外，紅豆冰嘅大小比起出邊大杯好多。本人非常鍾意飲紅豆冰係因為鍾意食紅豆，而佢啲紅豆份量亦都好多，好正。大家如果經開北角一定要試吓呢間茶室，老闆同埋員工嘅招呼都非常有禮貌同埋好客，下次一定會再帶朋友一齊食。