R&B (Closed)

朋友話係IG見到呢間餐廳好似幾靚，提議過黎試吓。一入到去果然無令人失望，一大幅落地大玻璃，映襯窗外翠綠既大樹，猶如一幅自然風景畫，難怪咁多人鐘意黎打卡。我哋今次夜晚黎，燈光昏暗，坐喺餐廳內感覺被窗外嘅大樹包圍住，非常有氛圍！我哋點咗個snowboard salad, 一上菜就已經覺得非常吸睛，擺盤好靚好特別，色彩繽紛，簡直係視覺上嘅享受。沙律菜上面鋪滿salami、蝦、雞蛋、烤南瓜片、三文魚籽、腰果、薯仔、蘋果，仲配上一兜芝士沙律醬，全部食材都好新鮮好足料，口感層次豐富，好fresh ！主菜我哋點咗煙肉忌廉蛋汁意粉。意粉彈牙，醬汁有濃郁嘅芝士同奶油味，好creamy, 不過可能太多醬汁，食食吓有啲膩。另外點咗兩款小食。蒜香松露薯條 - 薯條炸得香脆，同面頭嘅酸忌廉醬好夾，松露香味就淡咗啲，不過整體非常惹味，食唔停口。海苔蜜糖雞翼 - 海苔佈滿成兜雞翼，不過有少少蓋過咗蜜糖味。另外仲有附上幾塊青檸，唧啲青檸汁落雞翼到感覺清新，可以中和吓油膩。今次試完R&B，印象非常唔錯，環境舒適愜意，食物有質素，份量又大。下次要搵日黎試吓午餐，相信日頭有陽光透過玻璃窗照射入黎會更有feel，真係唸起個畫