勁餃笑

Open Now

Now Closed

自家製水餃店越開越多，食過一啲係充滿味精，狂飲水要到第二朝先覺得唔口渴。亦都食過一啲個皮仲厚過裏面啲餡！要幾恐怖有幾恐怖！今日試呢間餃子店，裝修門面好似日式拉麵咁，仲要個店名好有創意！加上有貓貓做主題，位於紅磡黃埔新村一帶。裝修好乾淨企理。主要做街坊生意，亦都見到有好多外賣平台落單。今日試咗四款餃子，每款八隻，雙拼麵餐。我哋都選擇咗胡麻撈麵同埋雞湯底，佢嘅雞湯都幾濃厚，而且一啲都唔鹹，我覺得清清哋好有feel！完全冇加味精！松露餃豬肉餃子黑松露味道濃郁，配搭豬肉，一齊做餃子，咬落去爽口彈牙！韭菜豬肉餃子傳統口味，裏面加有沙葛，食落口感似馬蹄，口感非常豐富！好好食！白菜豬肉餃子水餃鮮香多汁，充滿白菜嘅甜味！雞肉大菜餃子水餃裏面嘅大葉，即係紫蘇葉，紫蘇葉嘅香氣好濃郁，配埋雞肉做水餃，我都係第一次食，感覺都幾清新！金羅漢果白茶完全係自家製feel，唔甜，苦苦澀澀，飲落口，覺得好清涼好解毒！呢間餃子店，完全可以encore！