瀧宴日本料理

Open Now

Now Closed

南非鮑魚爽口有味道，汁煮蘿蔔極入味，有關東煮嘅既視感，八爪魚彈牙不黏稠，秋刀魚刺身魚味濃厚、肉地結實，吞拿魚入口即融，令人回想起喺北海道嘅冬日；吞拿魚他他配上米餅有口感上嘅層次，淡雪鹽為成件事加上咗微鹹嘅變奏，令佢變得不單調。一上個煎鵝肝炭火香就撲鼻而來，蒸發嘅醬汁香更加係令人食指大動，脆脆嘅多士加上嫩滑嘅鵝肝簡直係絕配，油脂充足不唔肥膩，每啖就有油煎嘅香味。蛤蚧湯清甜有淡淡嘅海水香，好適合食到中段清清味蕾，蛤蚧大隻有肉地，完全食唔到沙。煎野生龍蝦啖啖肉，海鮮同優質牛油相得益彰，海水由每縷肉絲之間滲出，煎到少少脆口，唔會太乾太老，一切都配合完美。頂級煎牛柳五成熟就剛好，表面微焦，裡面軟腍，加埋炸蒜片又係另一種樂趣。最後上個自家製白桃啫喱，清爽清新，好適合做結尾，白桃味濃、甜而不膩，冰冰涼涼，好正！