釣魚翁 燒鵝．海鮮飯店 (Closed)

好耐無去過烏溪沙飲茶，因為食過幾次都覺得麻麻，又唔抵食，所以好一段時間都無去。不過媽咪之前同朋友食過話好食左，今次就帶我去食多次。煎得好靚嘅花枝餅，熱辣辣好好味。個花枝餅唔會好粉，咬落都有啲墨魚粒，加埋香甜嘅粟米好好味。熱辣辣嘅蝦腸，啲蝦好大隻，唔可以話好新鮮，但係至少無雪味同埋都幾鮮甜爽口。不過配生菜就唔係好夾，如果換成韮皇就正（當然韮皇又貴啲喇）。燒鵝瀨，竟然係脾位。啲燒鵝燒得好腍好滑，個皮係脆嘅，超正！個粉同湯就正常。呢個牛根炆得好腍，又係好好味。不過對於佢個汁我就唔係好鐘意，但唔係難食嘅。仲有一舊牛根腩喺入面。最後嘅甜品，呢個椰汁糕十級推介。軟硬度適中，食落好香嘅椰汁味，但係又唔會好甜，勁推介！整體嚟講，食物質素提升左。雖然唔算係好平，不過性價比高，唔叫好貴但好味，同埋夠近，係馬鞍山區最高質嘅酒樓。除左因為全部都係熱辣辣之外，食材都新鮮左，大家可以去試下。