葉公館

Open Now

Now Closed

今日喺葵興上堂 ，專登拉埋honey來附近搵食 ，見到開飯網介紹呢度啲套餐孖寶抵食又好食， 所以嚟試下。見到個門面都幾靚呀，原來呢度唔單止有粵菜，仲有川京菜食， 上到一樓餐廳， 餐廳好大 ，菜式選擇好多， 店員姐姐都好有禮貌， 先開茶再送上小食， 碟小食係四季豆雲耳， 小小辣， 都幾好味 ，醒胃又開胃。 我哋叫咗個孖寶餐，再加一碟手撕包菜， 孖寶餐係叉燒加蒸石斑魚， 碟叉燒厚切上， 肥瘦兼備， 燒得香甜鬆軟 ，就算瘦肉部分一啲都唔柴， 嫩滑美味， 比得上名店嘅叉燒出品， 非常值得推薦。 跟住到啲碟蒸石斑上枱，雖然唔大條，但係肯定係好新鮮，魚肉係雪白嘅， 食落又嫩又滑 ，加埋啲蒸魚豉油，較得好好味 ，食到舐舐脷 ，停唔到口， 骨都選到乾乾淨淨。最後係碟手撕包菜 ，好大一碟， 四個人都夠食， 可惜辣咗少少 ，下次來記得叫走辣， 廣東人食辣係渣啲。食完飯仲有海帶綠豆糖水送，煲得超正， 唔係好甜 ，啲綠豆仲係大大粒，煲到啱啱好唔會太爛，有少少豆咬口，食得好過癮好滿足。 食飯食到七點幾都已經差不多坐滿人，可見呢度好受歡迎 ，非常之熱鬧，如果係週末肯定爆棚。