Video
Read full review
2014-09-30
4018 views
因為今個月係我生日，一班朋友幫我慶生，問我去邊度食，上黎open rice八一八後就決定試下呢間！餐廳位置於天后邊，但如坐地鐵去，就砲台山落車行去會近D同舒服D。餐廳比較細，大概只有十張檯，我地早左去，佢地都比我地入去坐住等其他朋友。同埋一定要訂位先好去，因為目睹有客無訂位想食，就算眼見好似有吉枱，餐廳都只係話成晚full左，所以一定要訂位！朋友怕燒鵝賣哂，所以亦一早訂了一隻。另外，鍾意飲2杯嘅朋友注意，因為無酒牌，所以無得賣，但餐廳好好，你可帶酒去又不收什麼開瓶費。我地點左好幾個菜，上菜超快，15分鐘內幾乎所以菜都上哂，一枱滿滿的，係個飯慢左少少。另外，因為有一朋友不能食蝦，所以個蝦多士就要少一件，點知個侍應姊姊誤會左，其他所有以件數計的都少了一件⋯咁唯有食少件啦。去過鏞記嘅都知前菜皮蛋絕對係名物，咁呢度都一樣有。一如鏞記一樣，每人半隻，中間流心的，味道又唔乸，絕對係好食！第一樣梗係主角燒鵝，佢其實同鏞記味道同賣相都相當不同，呢度比較多汁淋上去，所以皮沒鏞記脆。老老實實，去過幾次鏞記食燒鵝，唔知係唔係唔啱時候定我唔好彩，完全非常一般，完全唔想encore。但係個人嘅話，喜歡呢度多D，
餐廳位置於天后邊，但如坐地鐵去，就砲台山落車行去會近D同舒服D。餐廳比較細，大概只有十張檯，我地早左去，佢地都比我地入去坐住等其他朋友。同埋一定要訂位先好去，因為目睹有客無訂位想食，就算眼見好似有吉枱，餐廳都只係話成晚full左，所以一定要訂位！朋友怕燒鵝賣哂，所以亦一早訂了一隻。另外，鍾意飲2杯嘅朋友注意，因為無酒牌，所以無得賣，但餐廳好好，你可帶酒去又不收什麼開瓶費。
我地點左好幾個菜，上菜超快，15分鐘內幾乎所以菜都上哂，一枱滿滿的，係個飯慢左少少。另外，因為有一朋友不能食蝦，所以個蝦多士就要少一件，點知個侍應姊姊誤會左，其他所有以件數計的都少了一件⋯咁唯有食少件啦。去過鏞記嘅都知前菜皮蛋絕對係名物，咁呢度都一樣有。一如鏞記一樣，每人半隻，中間流心的，味道又唔乸，絕對係好食！
第一樣梗係主角燒鵝，佢其實同鏞記味道同賣相都相當不同，呢度比較多汁淋上去，所以皮沒鏞記脆。老老實實，去過幾次鏞記食燒鵝，唔知係唔係唔啱時候定我唔好彩，完全非常一般，完全唔想encore。但係個人嘅話，喜歡呢度多D，隻鵝肥瘦適中，絶對無大大舊白色脂肪。佢個切法亦相當特別，個胸肉係起哂骨，但又唔係潮州鵝片咁薄，size 剛剛好，啖啖肉非常之正，肉味濃又唔un,個汁望落好咸，實則係味道啱啱好，而且隻鵝都相當大隻，我地一行七人已經勁食都食唔哂，仲食剩小半隻要打包添，咁400幾蚊隻真係超抵食，絶對會想encore！
呢個蝦多士亦非常不得之了，望落個樣普普通通，點知一咬，正到講唔到野，隻蝦一定係新鮮貨，超級爽口又有蝦味，調味亦好，味道不濃及完全食得出鮮味。個廚師火路控制亦非常好，個多士又香又脆，但又唔油，完全唔會一口油。
去過鏞記飲茶都知，鵝膶腸包亦係另一名物。呢度都有，但係係mini version。佢將一塊好細嘅腸放左一片好細嘅方包上。條腸同鏞記一樣好味，但份量太少，一碟6件應該用唔到一條正常size嘅膶腸，而且同方包又唔多夾，好食係好食，但唔抵囉！
呢個咕嚕肉亦非常不錯，完勝鏞記。呢度應該係用山渣調味，碟中唔見菠蘿洋蔥咁，但個酸甜度調教適中，肉係切成厚肉片，細細塊咁，炸得外脆內軟，汁係掛在肉上，又唔太多汁，稀杰剛剛好，又夠獲氣，one of the best in town! 只可惜又係太細碟，一上枱，朋友已經講，嘩乜咁細碟，似2-3人份量喎！
跟住就係我想食嘅鬼馬牛肉。呢個老菜，同枱有D年青友人都未食過。其實即油炸鬼炒牛肉，我小時候同屋企人去親地茂館食飯一定會叫呢樣，記憶中係超好食，牛肉有䓤香，油炸鬼吸左汁但又會脆卜卜，諗起都好味。而家好少地方有得叫呢個餸，就算有都唔好食，見呢度有咁就叫下，希望可以食到童年味道。可惜呢度同坊間一樣係唔多好食，亦係全晚最差的一樣。個油炸鬼切得太厚，又炸得唔夠脆，只得個硬字，其實應該係切薄片的，汁就更加唔好講。牛肉就係普普通通通，乸過梳打粉的牛肉，一般酒樓貨色，一D䓤香都無，成個芡又太杰，有D槳胡feel, 味道又咸左D，欠望，我估我可能永遠食唔到兒時味道。
呢個係加大啫啫生菜煲，點解我特意咁講，因為我唔覺佢似，我地每人夾左一次，成煲就清左⋯至於味道方面就一般啦, 不過獲氣係夠的，我就覺得新斗記比呢度好食得多，呢度不過不失啦。
朋友想食豆腐，於是點左上湯生煎豆腐，我無食到，朋友話味道不錯，外脆內嫩！
呢個鵝汁飯就一定要叫嘞！超級好味！飯有米香，軟硬適中，鵝汁令個飯好香。飯𥚃有冬菇，肉粒，蔥等，非常有獲氣，不能形容的美味！呢個份量又係大件夾抵食，每人起碼有一碗多DD。
雖然友人有買了蛋糕，但大家都想試下呢度個紅豆沙。唔知係唔係因為時間已經接近收舖，個紅豆沙非常杰, 如紅豆槳，個陳皮味又太濃，令到有D澀味，上環娥姐嘅好味幾倍，早知唔叫。提提大家，係要比$50切餅費嘅。
總括來説，呢間D野普遍都幾好食，特別係燒鵝同個鵝汁飯,絕對會令我返轉頭幫襯，其他小菜就size略細，service亦ok, 咁overall 我會prefer呢間多過鏞記，隻鵝已經完勝左。
Post
