亞泰廚房 (Closed)

蜜桃小丸子係九龍城試過唔少食肆後，今日終於要寫重頭戲，就係九龍城嘅泰國菜喇！九龍城素有香港小曼谷之稱，泰國食肆開到成行成市，真係總有一間係你附近，今次就試位於獅子石道嘅亞泰廚房。舖頭空間感十足，兩個人可以坐四人枱，見到佢有啲大啲嘅梳化位，相信如果叫多啲朋友一齊食都會坐得舒服。第一道菜係泰式炒通菜。以前係屋企炒通菜，唔知係咪唔夠鑊氣，梗係炒得唔爽脆。呢道菜就炒得好，有紅辣椒、豆豉同蒜頭，食落口有好香嘅蒜味，微辣，咸度適中，仲要熱辣辣出緊煙，一食就知係廚房岩岩炒出嚟，好爽好脆，好食！第二道菜係招牌麪包咖喱軟殼蟹。啲麪包好脆，軟殼蟹好足料，唔會係瘦到食唔到肉嘅，質量甚高，咖哩內有紅椒同青椒、洋蔥同好多嘅蔥，份量十足，將啲咖哩同麪包撈埋一齊食，腦海裏浮現出一句說話，就係「辛苦賺錢就是為了食好野！」第三道菜叫了泰式炸蝦餅，啲蝦肉好新鮮好彈牙，炸得剛剛好金黃色的，隔離有啲蕃茄同青瓜伴菜，就算食咗熱氣野都感覺無咁上火。總括嚟講，食物質素高，價錢公道，坐得舒服，相信會再嚟試！