榕記車仔麵 (Closed)

好多人都話將軍澳係香港第二個美食沙漠，所以我A姐喺將軍澳做完嘢都急急腳番觀塘搵嘢食。但竟然俾我喺將軍澳新都城中心遇見佢！佢就係上次喺九龍城試過嘅榕記，佢個湯底真係太好味，決定encore。四餸車仔麵上次喺九龍城試過姬松茸蟲草花湯，今次就試胡椒豬肚湯啦。好欣賞佢將濃味嘅餸另上，以免影響湯嘅原味道。先飲啖湯，呢個胡椒豬肚湯有好香好濃嘅胡椒味，唔算話好辣，湯底仲連埋豬肚，吸晒胡椒味，爽口彈牙，無騷味。今次叫咗雞中翼、咖喱牛柏葉、鮮牛肉同魚肉春卷。雞中翼嘅鹵水醃得入味，雞肉嫩滑；鮮牛肉，肉質鮮嫩，入口軟腍；咖喱牛柏葉夠晒辣，食得夠過癮；而魚肉春卷彈牙香濃。蒜泥白肉一個人食蒜泥白肉好似好罪惡添，好彩白肉唔會太多肥膏，肉脂分布平均，仲有青瓜鋪滿住，值得推介。