老三火鍋 (Closed)

同朋友聚會，我地最鍾意就係打邊爐，因為每個人都可以食自己鍾意食既野，而且一年四季都可以食，我地今次去左呢間用鴨做湯底既舖，坐底之後店員會拎火鍋醬料俾我地，簡簡單單有蔥、蒜、辣椒粒等四款醬料，之後揀湯底，店員主動同我地介紹佢地既招牌湯底-老鴨鍋，個鍋滾起之後店員同我地每人裝左一碗，話飲左湯先打邊爐，個湯好足料，好清唔油膩，鴨肉已經煲到骨肉分離，肉味濃郁，飲完湯就可以開始打邊爐啦!蟶子皇雖然食到尾有少少沙，但都幾大隻肥美，好新鮮。魚卜好新鮮，個個都脹卜卜，店員拎到出黎會幫我地剪開，膠質重，唔錯。炸魚皮好大碟，每塊都又大塊又脆，唔會太咸，好好味。鮮淮山每次打邊爐都會叫既鮮淮山，夠新鮮爽口。蟹柳棒呢度啲蟹柳唔係出面啲cheap cheap 假蟹柳，味道係好正常架!油麥菜個樣好靚仔，好新鮮，而且個份量都幾多。稻庭烏冬食到最後一定要食返個烏冬，佢地會提供埋"罩呢"俾你裝住個烏冬，烏冬吸收哂湯底既精華，好好味。優質蘆薈蜜我地叫左一渣蘆薈蜜，清清地唔太甜。值得一提既係，呢度係免加一架，而且呢度啲店員都幾細心，會經常過黎同我地加湯，而且又會主動幫我地撇走面嗰層油，值得一讃。