Amitie Kitchen (Moved) New Location

朋友聚會👭最頭痛就係負責搵餐廳，今次到我負責，搵到尖沙咀亞士厘道呢間Amitie Kitchen，上到去都差不多full晒，好彩book咗位啫📞。點餐前，店員拎咗一籃餐包過嚟🥐🍞，餐包方面有3款，有軟淋淋嘅麵包、香噴噴牛角包同埋脆條，如果嫌味道太單調，可以點少少藍莓果醬同牛油。小食方面，我哋揀咗個自家製美式黃金蟹餅🦀，表層又香又脆，咬開有啲半流心黃色醬，原來係蛋黃醬嚟㗎，好特別呀，而且真材實料，好多蟹肉，口感幼嫩。伴菜嘅沙律菜好新鮮🥗，咬落爽甜。主菜紐西蘭肉眼扒肉質鮮嫩，咬落好juicy😋！伴碟嘅薯蓉細嫩軟滑，牛油味香濃，非常美味。鹹蛋黃醬煙肉磨菇意大利麵好香蛋黃醬🍝，醬汁夠多又夠creamy，煙肉磨菇份量足夠，意大利麵煙韌彈牙，碟邊曬滿香草，賣相十分之吸引。朋友都大讚呢間西餐唔錯，幾多嘢食，大家聚會都不妨試吓呢間，絕對係一個唔錯嘅選擇👍。