Bulldog Hotdog (安祥路) (Closed)

成日都聽到呢個熱狗品牌，大家都差唔多一面倒咁讚佢有幾用心，筆者鍾意美式快餐就當然要入大埔試一試佢。到餐廳個陣都差不多九點，快快手手叫咗一個漢堡同一個熱狗跟combo。芥辣墨魚蝦堡size都唔細，最好拎刀叉分一分開會易食啲。包應該係自家製，非常鬆軟。炸墨魚同蝦外脆內軟，兼食到有蝦同墨魚係入面，幾欣賞芥辣醬同生菜蕃茄青瓜可以中和炸物嘅油膩。美中不足係，雖然有清新感，但係下層包好快變濕，食到最後下層個包散晒咁，影響咗個口感。叫餐之前就咁聽個熱狗名叫招牌熱狗，完全唔知係咩黎，只係知有少少辣，抱住「surprise me!」嘅心態試試。熱狗包一樣係自家製，估唔到原來招牌會走墨西哥style，taco同sour cream冇諗過可以咁夾熱狗腸，配上辣肉醬口感豐富。配餐薯角薯條唔記得影相，不過兩樣都係厚切，熱辣辣又大大份，好好食。味道黎講Bulldog絕對係有質素的，所以一直都覺得只要好食，就算快餐，七十蚊up都可以物有所值。唯獨係呢度環境就未必坐得好舒服，特別如果想夜晚食，叫外賣嘅話成個體驗應該會好好多。有機會再黎嘅話仲想試埋配咖啡，再配熱狗應該幾唔錯。