留家廚房

Open Now

Now Closed

光顧留家廚房，一定要有準備，由於全部都係心機菜，所以訂位嘅時候已經訂埋菜式。鎮店之寶留家煙燻雞，據稱用足 100 日大嘅靚雞先以鹵汁浸熟，再用片糖，甘蔗同乾玫瑰花蕾煙燻而成，平時最鍾意食煙燻食物嘅我當然覺得勁正，一放入口就聞到朕煙燻香味🤤。另一樣我覺得好好食嘅係留家叉燒，據稱係採用較為罕有嘅梅頭咀，並以廖孖記醬料醃製，即叫即燒，肥瘦均勻，蜜汁香甜肉味濃，仲有我最鍾意嘅燶邊，💯分。蝦子柚皮平時好少食，今次一食又係愛上，兩大塊柚皮炆得好腍，差啲入口即溶，據聞係用金華火腿鮮雞湯炆，難怪咁入味；芡汁口感偏稠，入面有我最鍾意嘅蝦籽，好正。冬瓜盅又係我嘅至愛，用料豐富，湯汁鮮甜，飲一碗其實唔係好夠喉😂。梅菜蒸芥膽又係第一次食，重點係鹹香嘅梅菜，芥膽反而變咗配角。最後係製作勁需時嘅太史戈渣，呢個原本係北京街頭小吃，主要以上湯，雞蛋同粟粉製成，食落味道有啲似玉子豆腐，幾特別，但唔算得上好好食。值得一提係呢度嘅白飯，同伴話係用好貴嘅日本電飯煲煮，特別好味，我唔係飯控，其實唔太食得出個分別😂。