金峰靚靚粥麵

Open Now

Now Closed

今日去完行山，落番黎搵食，朋友話呢間店好出名，好好食，就去左呢到買外買。一去到，已經見到人龍排緊隊買外賣，落單都排左一陣，加埋等拎野食，都用左3-4個字。粥黎講都唔算貴，因為都幾大兜。聽講呢到既豬膶好好食，所以就買左兩碗粥（豬紅豬膶粥，豬心豬膶粥），同一份炒麵，一份炸両。豬心豬膶粥，唔係到到都會有豬心食，所以試下。整體黎講，粥底都唔錯，有陣香味，食落去唔會太粉或者太稀，豬膶確實幾好食。豬紅就同其他店差唔多，冇話特別入味，配料份量方面都可以。炸両要讚一讚，卜卜脆，加埋薄薄既腸粉皮，好食。不過冇留意到佢淨係俾左一包甜醬，唔夠撈，好彩屋企雪櫃仲有甜醬剩，相反辣醬就俾左3包。一間粥店竟然有茶餐廳飲品，幾特別，但反而冇豆漿飲，有點意外。