星廚 (Closed)

一行四人收工來到太子，一早訂位入去，本身想食烤焗鹹豬手和油封鴨髀，但店員強烈推薦新推出的邪惡雜扒餐，見份量十足價錢又抵，就半推半就點左一客。是日餐湯係南瓜蓉湯，近排我都喜歡南瓜蓉，南瓜味濃，而且有口感，都幾開胃！雖然飲完湯先送上餐包，不過唔緊要，因為餐包分開食都好正，遠處已經有香味十足嘅蒜蓉味！熱辣辣嘅包又唔會太乾太硬，好想encore！主菜嚟啦！基本上四人先食得晒，醬汁分別有沙律醬、薄荷醬、茄汁、芥末和燒春雞嘅燒汁。伴碟有薯條、炸洋蔥圈和粟米。炸洋蔥圈非常好食，炸漿薄薄一層，洋蔥又熱辣辣！最好食係厚切牛油牛柳，五成熟內裡肉汁爆曬出嚟，極香！燒羊架亦是同樣出色，配薄荷醬一流，燒得剛剛好，有肉汁得來外面又香脆。今餐實在太多肉啦，不過都唔後悔，因為好好食！下次再來挑戰豬手和鴨髀。