磊犇 (Closed)

冬天就係好易會食好多野變豬嘅時候！今日黎咗食呢間自助鐵板燒，成間野都係食牛嘅，有牛排、西冷同牛肩肉選擇，唔同重量(200/300/400g) 就唔同錢咁樣。我地叫咗一個係貴d嘅西冷200g 同一個牛肩肉300g.原來個石板真係好熱，所以係好快就要將佢反面同埋切開，如果唔係就好似我張相入面最中間嗰嚿咁，燒燶咗呀！ 我覺得佢其實真係應該要post一張紙出嚟，同大家講大概幾耐就係幾多成熟，同埋要先反面再切會比較好。最後呢我哋真係太手忙腳亂呀，因為其他食物都係自己攞，包括餐具，所以你簡直就似同時間競賽嘅感覺。最後就真係有啲燶咗但係d肉仲係有好多汁嘅，同埋佢本身就有唔同嘅醬料，我就覺得照燒汁係最好食，會感覺冇咁油膩~另外個set仲有配昆布味噌湯、白飯、泡菜、醃蘿蔔同沙律菜，全部都係任食，所以女仔200g肉其實已經好足夠！總括嚟講我覺得幾抵食嘅，因為佢其他食物任食，而且肉嘅份量其實都好多嘅，先至~120蚊一個。但係自助形式就可能令你比較手忙腳亂，而且位置比較窄，我哋兩個人其實要用咗四個人嘅位因為如果太近嗰啲鐵板呢就好驚會整親自己，如果位置寬闊啲就一流。