醉辣鮮 (天空之城)

Open Now

Now Closed

經朋友介紹嚟到呢間專食粥底蒸海鮮嘅餐廳，交通都算方便，喺錦上路轉巴士幾分鐘就到。佢有幾款唔同嘅海鮮餐，今次我哋叫咗肉蟹放題海鮮餐，套餐本身定量嘅有蟲草花蒸雞、珍寶蟹柳、小籠包、生蠔、扇貝、鮑魚同海蝦。然之後肉蟹、各式蜆類同蔬菜就可以任食。嗌完餐就即刻可以出去自己”捉”海鮮！門口有幾個大大嘅水缸，入面裝滿各種生猛嘅海鮮！根據嗌嘅套餐，夾番相對份量嘅海鮮然後就交俾店員進行清洗同準備，係一個唔錯嘅新體驗，保證海鮮新鮮生猛。返到座位就已經見到店員安排好蒸雞件同老火湯，雞件都算滑，而家用咗紅棗杞子同蟲草花，非常入味。食到咁上下店員就將我哋嘅海鮮送到，仲好貼心咁俾咗一張有每種食材所需蒸煮嘅時間嘅表我哋，咁就唔會蒸唔熟或者蒸過龍。海鮮全部都好新鮮，尤其係鮑魚口感爽彈，肉蟹蟹肉鮮嫩食落鮮甜，扇貝夠大粒，仲可以根據個人喜好，加上粉絲同蒜油！食到最後可以食埋個南瓜排骨粥底，蒸海鮮時嘅汁會完全流晒落去，吸收晒所有海鮮嘅精華，特別鮮美，食唔晒仲可以打包返屋企添。飲品方面叫咗大大杯檸檬茶，清涼又解渴。最後有桃膠作為甜品夠晒滋潤。星期六日仲有駐場嘅Live Band，絕對適合親朋戚友渡過愉快嘅週末。