祥發茶餐小廚

Open Now

Now Closed

今次介紹呢間係北角區比較多人識既茶餐廳，門面上無咩特別，入到去既時候一睇餐牌，你會發現一樣野係同其他餐廳有好大分別，就係呢度可以自由選擇配搭唔同食物，咁可以根據返自己口味同價錢選擇、彈性會比較大。呢度最出名既係瑞士雞翼、瑞士雞髀，咁我都二話不說點左招牌瑞士雞髀，另外加個火腿奄列同埋沙爹牛肉麵，一杯凍檸水咁啦~ 等左大約五分鐘~ 上枱啦~ 上枱啦~ 首先上枱既招牌瑞士雞髀，一睇個賣相，深色既瑞士汁雞髀，你未食都已經覺得係好入味，食落口亦發覺真係同所諗既一樣好入味，甜甜地既瑞士汁入晒隻雞髀到，可以話色香味都有，但亦有扣分地方，就係因為煮得比較耐既關係，的肉食落去都比較"鞋"，但總體上都可以接受既。跟住到呢個沙爹牛肉麵啦，呢個沙牛麵老實講質素就比較普通，例如牛肉唔係太入味，而且沙嗲汁都唔夠惹味，麵底都係普通大光麵，所以配合起黎呢個味道只屬一般。另外呢度個火腿奄列，比例亦算正常，味道不過不失，蛋就有少少燶底。最後杯凍檸水份量普通味道正常。呢間餐廳環境上而言，下午茶時間去會比較舒服，坐位上會有少少逼，但呢段時間食好可以慢慢享用，咁埋單計埋$42蚊，如果一個正常茶餐加隻雞髀，咁既價錢都算好抵嫁啦~