Odelice! (The ONE)

Odelice算係香港站得住腳嘅法式小餐館，有好多年前灣仔小巷嘅小店，發展到而家喺多個大商場都有分店，可見水準得到食客認可！今日幫襯The One店，二人餐可選兩個前菜或者一前菜一甜品，主菜都係可以揀兩個，亦有一啲升級選擇，加嘅錢亦唔算加得多。欣賞呢度嘅麵包熱辣辣，外脆內軟唔係間間餐廳做到，蕃茄忌廉湯唔會過酸非常creamy，配麵包食一流！我地前菜揀咗Burrata Salad，芝士份量好大，沙律菜主要以橄欖油調味，加少少黑醋，味道清淡，作為開胃菜啱啱好。主菜揀咗Tenderloin同豬鞍扒，前者做到好靚嘅medium rare色澤，配上特調醬汁好香！豬鞍扒係切好上嘅，蘑菇汁係亮點，豬鞍本身口感似豬頸肉都幾啱我口味。甜品揀咗蘋果撻，法式甜品嚟講唔算甜，蘋果肉仲保留到少少爽甜嘅口感～值得一讚呢度嘅白酒同mocktail，多選擇味道亦好，飲唔飲酒都可以喺呢度好好chill一晚。