潮人私房菜 (Closed)

禮拜日出親去食飯都人山人海，咁啱約左幾個朋友食飯傾下計，想搵間有自己空間，傾計大聲d都唔怕嘈到人，又唔怕人地大聲嘈親自己既地方真係唔容易！咁啱上兩個禮拜，有朋友試左間私房菜話好OK，有自己房，d野又好味，我就即刻book左睇下咩料！ 今晚去到，未食飯都加左分，因為地點便利，尖沙咀地鐵站行去3，4分鐘就到，入到去好似自己屋企格局，好乾淨！ 私房菜有度好，只要講低有咩唔食，佢就幫你揸哂fit，街市咩靚咩新鮮就煮咩！啱哂我呢d懶諗食咩既人！ 我地5個人去食，有1湯6餸1甜品。 第一道上湯先，係大白菜豬肺湯，肯煲呢d咁花功夫既湯，證明有誠意！豬肺洗得乾淨，湯都夠老火，我地連湯渣d豬肺都唔放過，清哂！ 其中花膠冬菇鴨掌令人印象深刻，花膠同鴨掌入哂味之餘，鴨掌仲入口即溶，連側邊d冬菇咁厚肉，都炆到稔哂！好味！ 仲有黃金蝦熱辣辣 炸得好好，連殻都可以食埋，加埋咸蛋黃勁香口！ 全晚最欣賞個蘋果咕嚕肉，有別平時食開用菠蘿整既咕嚕肉，蘋果入口非常爽口，比菠蘿更為清新，啲咕嚕肉唔會一味得d 粉包住稔pat pat，反而好脆身，一定要即整又較啱火候先做到！外脆內軟有邊個唔鍾意？我地眨下眼就清哂啦！