吉野家 (Closed)

夜晚食吉野家，緊係要打邊爐。我最鍾意佢嘅芝士竹輪鍋，不過睇餐牌先知原來佢已經冇咗以前50幾蚊嗰種火鍋，得返$72嘅芝士竹輪鍋，不過啲餸就多好多。以前淨係可以揀牛肉或者雞肉，而家就兩款肉都有，仲有三舊芝士竹輪。佢啲牛肉嘅份量都幾多，但係個人認為有啲太肥，相反雞肉又太瘦。其他配料就同以前差唔多，有南瓜、粟米、豆腐、蟹柳、金菇、冬菇、豆卜同埋菜，樣樣餸都同濃湯好夾，好好食。雖然啲肉嘅質素麻麻地，但係呢間分店有好多位，又唔會好迫，落單同出菜都好快，而且啲店員周不時會幫你收起啲碟，個人認為係唔錯嘅分店。