意蠔屋 (Closed)

今晚又同男朋友去大圍覓食。諗咗好耐都唔知食咩，所以就好隨意地揀咗依間餐廳。依間小小嘅餐廳只有20幾個位，枱與枱之間距離好近，所以會坐得比較迫狹。今晚揀咗兩個晚餐套餐，套餐包餐湯、主菜及餐飲。先送上餐湯，一紅一白。一放上枱，就覺得。。。好細碗，唔係淨係我咁講，連隔離枱嘅客人都話好少。白湯飲落去好杰，而且有好多胡椒味，亦都有啲不明嘅蔬菜，不過都接受到嘅，唔算難飲。至於紅湯，一般般。主食分別揀咗芝士焗帶子大蝦螺絲粉同燒汁牛柳雜菇意粉。個芝士焗粉有兩粒帶子同三隻大蝦，有勁多芝士喺上面，撈埋一齊食之後勁拉絲，對於喜歡食芝士嘅人嚟講，係超超超正！！燒汁牛柳雜菇意粉嘅牛柳煮得啱啱好，唔會過熟，都幾好食。