茶咖廳 (Closed)

同老婆嚟開紅磡就周圍搵下嘢食先，係環海東岸果邊有個商場仔，之前都見超市上面開咗間小店，就膽粗粗試下！店面唔係好大，大約坐到五、六枱到，坐得唔算好舒服，當日冷氣亦唔算好夠🥵但啲嘢食質素又認真唔錯喎！我地嗌咗個常餐配凍奶茶($52)多士十分香脆，太陽蛋同火腿就正正常常。叉燒意粉比想象中好食，叉燒都有四五塊，入口鬆軟，而個湯底有好重忌廉味，好香原本配通粉應該更正（可惜我唔鍾意食）另外叫咗個All day breakfast配凍咖啡($72)芝士奄列口感好豐富，底下仲有舊班戟，吸曬芝味好正！雞肉腸，煙肉，茄汁豆，白蘑菇等等亦不過不失。飲品好大杯，凍奶茶香味濃郁，普通咖啡就一般，下次再試其他。