怡和園

Open Now

Now Closed

上星期朋友生日,本來諗住去聖安娜買蛋糕,放工行過楊屋道途中,有個幾靚女的姐姐仔派張傳單俾我,睇下原來係上樓蛋糕店,就係我公司附近(我係橫龍街附近返工),於是第二日就走上去睇下,估唔到工廠大廈上樓舖都可以裝修得咁靚,裝修到完全唔似工廠大廈的單位,一入門口就有個蛋糕櫃(不過係切餅來既),有好多特別的口味,街舖好少見,例如有荔枝味,青檸味等等,因為上樓舖唔似得街舖咁多人,店員好熱心介紹,但係始終第一未幫襯過,就買住切餅(拿破崙)返屋企同屋企人試下咩質素先,個拿破崙切餅的酥皮好鬆脆,d吉士cream好香雲尼拿味,屋企人同我都食得好滋味,於是第二日我又走上去,老板娘o岩o岩係度,佢建議我地試下佢地舖頭的招牌蛋糕「曲奇焦糖mousse蛋糕」,齋睇樣好似好甜好滯咁,但係老板娘話個份量有調較過,減少左糖的份量,唔會好甜,飯後一個人閒閒地切兩件來食都唔會覺得滯,見尋晚個拿破崙都咁得,就信老板娘一次,買左呢個招牌蛋糕,去到同朋友慶祝,切來食過大家都好驚奇(包括我自己),真係甜而不膩,焦糖的香味加上曲奇碎的口感,真係無得頂,怪唔得之係鎮店之寶的招牌蛋糕。