名煌金閣

Open Now

Now Closed

平時都好鍾意去深水埗一帶嘅大排檔食小菜，今日想特別啲，食好少少，朋友就介紹咗我嚟呢間中菜館食。首先環境喺長沙灣一帶真係算有高級感，環境好企理，坐得舒服而且好闊落！《黃金蝦多士》$108即炸嘅感覺真係好正，多士勁香脆！即使攤凍咗都仲係好脆口，蝦肉夠肥厚又彈牙，好味！《特色鮮沙薑煎雞》$138呢個沙薑雞真係買少見少，因為新鮮沙薑我都係第一次食，出面大部份嘅餐廳都係用沙薑粉，同埋雞肉煎完之後好香好好味。《鳳梨脆皮咕嚕肉》$118咕嚕肉汁好夠，唔會好乾，而且都好香脆，皮就中中等等唔算太薄，驚喜嘅係鳳梨用新鮮嘅鳳梨，唔係罐頭菠蘿，整體來講都值得推介。《原籠荷香金銀蒜蒸龍躉球炒飯》$168超推介！炒飯濕潤度適中，亦都有口感，而且又大量蛋絲同埋勁香蒜蓉味，淨係呢個炒飯都食到停唔到。龍躉球好肥美，好軟嫩，份量都算好多。《生磨蛋白杏仁茶》$32個人本身唔係好鍾意杏仁茶，朋友嗌左所以我就試一試，點知都OK，杏仁味唔算好重，唔使每一啖都食到好多蛋白，亦都唔太甜，年紀大啲食都唔會有負擔。 總括嚟講覺得呢間中菜館真係幾高質，雖然價錢唔係最親民，但係呢個味道值得付出。