Video
Read full review
2014-07-13
3206 views
本來同幾個朋友專程嚟大坑試一試甚有人氣嘅The Pudding Nouveau，點知，無諗過星期四喺佢休息日，摸晒門釘，既然幾個人一場嚟到，無理由就咁散場，大家肚餓都要搵飯食架。記得晌街口嘅PizzaZaZa都幾唔錯，所以，改嚟食餐意大利晚餐。店鋪唔算好大，一字長形，雖然一張枱拍住一張枱，不過，勝在樓底極高，所以，空間感仍十足。雖然無乜意國風情，但簡約嘅裝修，讓人有份悠閒嘅感覺。講到食物嘅選擇，餐牌一頁過睇晒，分為4大類：前菜、熱湯、意粉、薄餅（或全麥薄餅），除兩款熱湯外，其他類別都有7、8樣選擇。而飲品餐牌則包括咗數款餐酒、啤酒、雞尾酒及非酒精嘅雞尾酒，望落去定價屬中等左右。麵包籃 $5 /位好多時出面一啲歐陸餐廳，都會免費送上麵包籃，我哋一坐落無耐，亦都送上一小籃共3款嘅麵包籃，埋單時先知原來要收費，$5 /位，雖然喺小數目，不過，$5麵包錢都要收就感覺有少少核突啫。麵包未至冷冰冰，但就一定唔暖，其中嘅意大利香草包（focaccia）仲有少少乾，小麥拖鞋包（Ciabatta）都OK，棍子麵包條（grissini）鬆脆就最得眾人歡心。反而醬汁的骰有啲心思，黑醋橄欖油、香草汁和蕃茄沙沙
店鋪唔算好大，一字長形，雖然一張枱拍住一張枱，不過，勝在樓底極高，所以，空間感仍十足。雖然無乜意國風情，但簡約嘅裝修，讓人有份悠閒嘅感覺。
講到食物嘅選擇，餐牌一頁過睇晒，分為4大類：前菜、熱湯、意粉、薄餅（或全麥薄餅），除兩款熱湯外，其他類別都有7、8樣選擇。
而飲品餐牌則包括咗數款餐酒、啤酒、雞尾酒及非酒精嘅雞尾酒，望落去定價屬中等左右。
麵包籃 $5 /位好多時出面一啲歐陸餐廳，都會免費送上麵包籃，我哋一坐落無耐，亦都送上一小籃共3款嘅麵包籃，埋單時先知原來要收費，$5 /位，雖然喺小數目，不過，$5麵包錢都要收就感覺有少少核突啫。麵包未至冷冰冰，但就一定唔暖，其中嘅意大利香草包（focaccia）仲有少少乾，小麥拖鞋包（Ciabatta）都OK，棍子麵包條（grissini）鬆脆就最得眾人歡心。反而醬汁的骰有啲心思，黑醋橄欖油、香草汁和蕃茄沙沙，味道各有不同。
雜菜沙律配茴香、西芹、榛子及香橙汁 $88一共有7款沙律可供選擇，當中有5款喺推介嚟，會唔會濫咗啲呢？點都好，揀咗其中一款雜菜沙律，其實個沙律底無咩特別，只不過喺紫椰菜同羅馬生菜，但就配料幾有趣：茴香、西芹、榛子，尤其前兩者，令個沙律嘅味道幾特別，配合埋橙肉及新鮮橙汁，有份鮮甜清新嘅感覺。
自家製雲吞釀蟹肉及軟芝士配蕃茄及松葉蟹腳 $188意大利粉或意大利類亦有7款選擇，當中又喺揀咗屬推介之一嘅蟹肉意大利雲吞。一客只有3隻意大利雲吞，每隻都算做得大粒，而且伴有一條松葉蟹腳，頗有睇頭，條松葉蟹腳味道亦唔錯，挺鮮味，然而，醬汁有啲普通，大概有啲似一般嘅洋蔥汁。至於啲蟹肉雲吞，內裡釀滿蟹肉及馬卡風芝士，由於馬卡風芝士屬味淡嘅芝士，所以，都無乜點搶去蟹肉嘅鮮甜；其實個皮唔算厚，不過，口感就有啲韌，似似哋煮唔熟、煮唔透嘅感覺啫。
牛肝菌煙燻水牛芝士全麥薄餅 $168以Pizza作為店名嘅一部份，薄餅自不然喺店內最耍家嘅出品，而薄餅分咗一般常見嘅麵粉所做嘅餅底之外，仲有另一類叫全麥薄餅（whole wheat pizza），市面極少見，當然要試一試啦。對比起有成8款嘅普通薄餅，全麥薄餅亦只得兩款：Coppa醃豬肩頸肉及Porcini牛肝菌煙燻水牛芝士。選後者因為大家都喺愛菌之人，牛肝菌的確幾香，蕃茄醬及水牛芝士落料十足，又加有少少香草，又真喺幾好食。全麥薄餅口感比較粗獷，另外搓得夠薄，入口幾鬆脆。
以一間小店嚟講，甜品有5款選擇算唔少，單睇名字都喺啲精選製作。如想加杯咖啡或茶，都只喺多俾$10，就算要意式泡沫咖啡或鮮奶咖啡，都只不過喺$16，超級划算！
意式芝士蛋糕配咖啡汁 $68賣相的的骰骰嘅意式芝士蛋糕（Tiramisu），單以「蛋糕」部份而言，甚具水準，餅底沾滿咖啡酒香，而中心馬卡風芝士軟滑輕盈。但整體嚟講，買相比較粗，只喺糝上唂咕粉及唧上少少咖啡汁，但味道喺焦糖味喎！原來，睇返個名，英文寫住「classic tiramisu with caramel and coffee sauce」，真喺唔明點解中文會無咗「焦糖」二字，而且，唧嗰少少，跟本試唔到幾多，況且，件蛋糕索價唔平。
肉桂脆配栗子蓉及朱古力汁 $88西班牙甜品Churros，都食過好幾次，一般都好似小型油炸鬼咁，幾吋長一條條，炸好再沾滿沙糖同肉桂粉，之後蘸朱古力醬食。但今次個Churros炸麵粉條甜品，就極之有驚喜。首先，都好鍾意店家所用嘅譯名「肉桂脆」，做成環形上下兩層，再加入栗子蓉，裝飾仲有栗子雪糕及紅桑莓，相賣立體唔單調。而個肉桂脆既香且脆，肉桂味突出，而栗子蓉柔滑粉甜，至於「朱古力汁」只喺底下一抹，用於賣相多過實際。
服務方面，普普通通，感覺店員似乎主要招呼幾枱熟客居多。幾款食物，整體而言，有好有唔好，拉平均計，可以講喺OK高少少。成日話啲「男人沙沙滾」即喺搞啲唔正經嘢，但嚟到PizzaZaZa，個牛肝菌全麥薄餅值得一試，記住佢個正名叫Porcini，「ZaZa菌」唔知會唔會成為佢個別稱！
Post
