薩莉亞意式餐廳 (寶輪街) (Closed)

薩利亞D野食抵得黎又好食呢樣野已經係常識，美孚呢間薩利亞我不時都會同屋企人一齊幫襯，因為幾時食都唔會有錯！我每次去薩利亞都會點既餐單就係咁樣既：甜蝦沙律D菜新鮮得黎量又足，甜蝦分量都超級大方，我會叫佢分開醬上，咁就可以滿足到想加醬同唔想加既人🙆肉醬多利亞每次上碟都熱辣辣，雖然分量唔大，但肉醬同芝士就一D都唔小氣，每一啖都食到大量肉醬同芝士，邪惡得黎又滿足！粟米火腿pizza如果叫pizza，一定係會係粟米火腿，香甜既粟米鋪滿整面，上面仲有我最中意既蛋黃醬！最驚喜係佢既芝士仲可以拉絲！咁既價錢食到拉絲pizza真係抵到笑！雞翼每次必點既其中一樣，最中意係佢個調味，咸香得黎有少少辣，非常惹味，就算凍左都好好食！而且雞肉都好嫩，食到肉汁，非常唔錯！明太子意粉首先明太子意粉就唔係太多地方食到，而且佢既明太子醬非常重料，唔會食到最尾無嗮D醬，調味都好出色，明太子既咸鮮完全出到黎，加上佢個意粉，幼身得黎軟硬度適中，出面貴一倍價錢都未必食到！除左野食好食之外，我都好中意佢個裝修，空間感大而且坐得舒服，唔怪得咁多一家大細幫襯啦。最近每次去都要等位，唔想等既就要早D去啦！💁